27.2.09

ХУАНДЕ ЗНАЕ ДЕКА ТЕШКО ЌЕ МОЖЕ ДА ЈА ОСВОИ ЛА ЛИГА, НО...

Денес имав исклучително позитивен ден, кој иако завршува со не така очекуван резултат барем за мојот фаворит. Но, за да си го потврдам мојот став онаков каков е, за време на снимањето на новата епизода на Топки Плус (која ќе оди в сабота) направив мал излет, барајќи и стручен став од оние кои се занимаваат со активната тренерска работа и постојно ги следат, барем шпанските, секојдневни настани.

Ќе ви пренесам дел од тој разговор... соговорниците ќе ги претставам со Т, бидејќи сепак почитувајќи го нивното право за дискреција на муабетите (и нормално, без нивна дозвола, не би сакал да ги споменувам по име, но да напоменам дека се тоа луѓе кои исклучително се ценети во нашите балакански рамки, а индивидуално и во дел од Европа)

Филе:
Не се сложувам, а и не сакам воопшто да верувам дека Барса е во криза, еден натпревар против Еспањол, сигурно не е репер за толку тешки квалификации?
Т:
Апсолутно, тоа беше мала криза која дојде по тешкиот загриз кој го направи Еспањол. Тие немаат што да изгубат. Ја применија истата тактика што Пеп ја прави кон остатокот на тимовите. Со пресија и одбрана која започнува уште на противничката екипа. Е тоа го направи Еспањол, ги нагази уште на своја половина, ги изненади... Пеп немаше конкретен одговор, веројатно затоа што не очекуваше таква пресија уште на старт. И се чувствува отсуството на Абидал. Практично, сега играат со двајца стопери иако се четворица. Алвеш ти е одбранбен со напаѓачки задолженија, тој само помага во одбраната. Сега Пеп има проблем, што до недела мора да го реши. Тоа истото го направи и Лион, буквално истото што го направи и Еспањол. На индивидуалната линија, Барса е неприкосновена. Таа игра еден на еден и тука е секогаш 1:0 за Барса. Но, овој проблем е решлив, а тоа за кратко време ќе се види и резултатски....

Филе:
Хуанде може да ја освои титулата?
Т:
Па, не може да се каже. Тешко, голема разлика е. И тој го знае тоа. Ова со Ливерпул е нешто во кое беше очигледно изненаден. Ама против Бенитез е најтешко да се игра, со кој и да е тим... Тоа е нешто што е врв меѓу тренерите.. Тој размислува на сосем различен начин, отколку сите други... Тој размислува и менува на секои 10-15 минути... тоа е нешто што е тешко да го претпоставиш... Не значи дека ќе се предаде во Ливерпул. А и дека ќе се откаже од победите во Ла Лига. Ќе се доближи, но тешко дека ќе ја освои... Треба да го следи луксузот што го има Барса, која може да си дозволи дури и уште два порази, без тој да направи кикс... Малку невозможно, нели? Но, сепак сигурен сум дека нема да се откаже од цврстата игра која има само една цел, три бода или да не се загуби...

Филе:
А зошто не го игра Снајдер? Можеше се да промени, не само во Лигата на Шампионите туку и во Ла Лига...
Т:
Снајдер не се вклопува во неговата формација. И тешко дека веќе ќе има стандардно место за него. Хуанде сака да игра со двајца чистачи позади, стопери, и две крила кои експлозивно бргу ќе се трансформираат во напад. И двајца класични шпиц играчи. Не сака многу, фудбалери кои се исклучиво за врска...сака поливаленти, не толку стандардизирани како Снајдер. За разлика од него на пример, Шустер сакаше токму обратно, да можеа сите „десетки„ да му бидат во тимот, ќе ги ставеше. А Снајдер е токму од формацијата на Шустер. Затоа е таков изборот на Хуанде. Трансформира, со не многу течност во играта, на пример како Барса. Ама ете Барса кога ќе ја загуби течноста, губи. А Реал не. Реал може и да победи и без којзнае каква убава за око игра. Тоа е Хуанде.


Ова беше краток извадок од кои се гледаат многу работи. За првпат одлучив ова да го направам, да го споделам со сите Вас кои сте најчесто овде на Мојот Став. Пренесениот разговор е воден меѓу тројца соговорници, тренери кои работат на балканските простори, а еден од нив и пошироко... во Европа.

23.2.09

МИНУС СЕДУМ ИЛИ МИНУС ДВА Е СКОРО ИСТО ЛАДНО!

Дали утрово сум подготвен за нов пост?
Прашање кое од синоќа до овој момент си го поставувам.
Веројатно, она што ме двоуми е тоа дали да се чека Лион, па после да седнам или и пред Лион. Очигледно одлучив пред Лион.

Кога минатиот пост, на моменти предизвика револт (кај некои) колку ли ќе предизвика овој?
Но, искрено, немам таква намера.
Само ги презентирам моите претпоставки во кои скоро 100% сум убеден.


Точно е дека во Мадрид се затоплува. Веќе температурата стигна до -7. А само пред 24 часа беше - 10. Во Скопје, најавуваат дека деновиве ќе се симнела и до -8. А во моментов надвор е -2. Само ќе прашам, чувствувате којзнае каква разлика од -8 до -2?
Не !
Ладно е и вака, ладно е и онака. И за двете ситуации, кога ќе излеземе надвор, ќе кажеме „кочан„.

Исто е и со ситуацијата на релација Мадрид-Барна.

Дали е - 7 или наредната недела ќе биде - 4.
Тоа е. Минус е Минус. А за да стане плус, пред се треба да се исполнат многу услови.
Прво додека едните губат, другите постојано да победуваат. А да не зборуваме дека за некој ден почнува циклусот на натпревари кои и двете екипи сакаат да го освојат.

Во едно се сложувам, а тоа е изјавата на Бабунски за Топки+:„...со ова бодовно салдо, да беше обратна ситуацијата, во Барселона одамна ќе ја отпишеа титулата, но Мадрид има сосем друг менталитет - не се откажува никогаш, па макар таа предност била и поголема...„
Да, тоа е точно, и тоа неколкупати се покажало како функционално.
Но, овојпат разликата е и во формацијата на останатите -7, во клупата на -7, во поквалитетниот кадар на тие -7 и во начинот на следните победи на сегашните -7.


Секоја чест за последниот натпревар на „мадриљеноси„. Но, не се сеќавам дека ваква експлозивност гледам често, обоена во бело. Исто колку што не се сложувам со тоа дека треба да се бара вината кај судиите кои како што вели Меси, „...го сменија текот на натпреварот„.
Едноставно тоа е тоа.
Минус седум и минус два, се скоро исто, ладно си е ладно... „ :-)


п.с.
...а подетално, како што секогаш тоа го правам, сепак, после среда ...